Aserka UIF

Aserka UIF

teste carvalho@goweb.pt https://www.bancocentral.tl/uploads/seo/big_1436805856_8449_button_accept.png
Menu Side Left > Unidade Informasaun Finanseira > Aserka UIF

Kona-bá UIF

Unidade Informasaun Finanseira ho abreviasaun “UIF”, nu’udar entidade administrativa hari’i iha Banku Sentrál Timor-Leste nia laran ho Lei nú. 17/2011 28 Dezembru, altera ho Lei nú. 05/2013/III, 14 Agostu, kona-bá Rejimi Jurídiku ba Prevensaun no Kombate Brankeamentu Kapitál no Finansiamentu Terrorizmu.

Maski Unidade ne’e hari’i iha Banku Sentrál nia laran maibé goza independénsia no autonomia iha jestaun operasionál. Estrutura no funsionalidade regula ho Dekretu-Lei nú. 16/2014, 18 Juñu.

Unidade ida-ne’e ofisialmente hahú nia operasaun iha 26 Setembru 2014 ne’ebé mák lidera hosi Diretór Ezekutivu nomea hosi Governadór BCTL ba termu tinan 4, ne’ebé mák toma responsabilidade tomak ba jestaun no operasaun loroloron nian.
 
Vizaun
Kontribui ba ba sistema finanseiru no laós-finanseiru ne’ebé dinámiku, sólidu no livre hosi brankeamentu kapitál no finansiamentu terrorizmu.

Misaun

UIF nu’udar entidade independente no sentru kredível, ativu hala’o funsaun prinsipal sira hodi fornese informasaun ba parseiru, promove programa habelar informasaun relvante ba públiku liu-liu ba entidade sujeita sira hodi garante kumprimentu ba obrigasaun legal; no promove kooperasaun ho Autoridade nasional no internasionál iha asaun kombate brankeamentu kapitál, finansiamentu terrorizmu no infrasaun subjasente sira.


Organograma



Kompeténsia

Dekretu-Lei nú. 16/2014, 18 Juñu estabelese kompeténsia UIF ne’ebé subliña hanesan tuir mai:

Unidade ida-ne’e prinsipalmente responsável hodi simu, husu no analiza informasaun ne’ebé mák relasiona ho relatóriu tranzasaun suspeita hosi entidade sujeita sira no informasaun relevante sira seluk kona-bá hahalok BK no FT, no dissemina rezultadu análize.

Bainhira iha dúvida katak tranzasaun ruma iha relasaun ho hahalok kualker tipu infrasaun subjasente defini iha Lei, UIF tenki komunika ba Prokuradór Jerál Repúblika, no kolabora ho autoridade judisiária no entidade sira seluk ne’ebé mák ho kompeténsia iha prevensaun no kombate krimi BK no FT. Parte ida hosi funsaun UIF nian mák promove edukasaun públika kona-bá tópiku relasiona ho risku BK no FT.

UIF bele halo akordu kooperasaun ho entidade homologu iha estranjeiru no autoridade judisiária inklui entidade sira seluk ne’ebé mák iha kompeténsia ba prevensaun BK no FT.

Tuir artigu 20 Lei ABK/CFT nú. 17/2011, funsionáriu UIF sujeitu ba devér konfidensialidade kona-bá informasaun ne’ebé asesu ba, bainhria hala’o nia knar. Bainhira halo violasaun sei hetan sansaun disiplinária no responsabilidade penál.


Kooperasaun

Tuir termu iha artigu 11 Dekretu-Lei nú. 16/2014, UIF halo ona akordu kooperasaun ho entidade nasionál no UIF internasionál. Kooperasaun institusionál hanesan tuir mai:

  • Kooperasaun Institusional – (2016)
  • Kooperasaun internasionál – Unidade Informasaun de Portugal (2015)


Kestaun frekuente sira


Definisaun BK no FT

BK no FT nu’udar lia-fuan badak hodi deskreve “Brankeamentu Kapitál” no “Finansiamentu Terrorizmu”, involve stratejia no dezenvolve medida ka iha hela prosesu dezenvolvimentu hodi kombate BK/FT iha nivél nasionál no internasionál.

BK mák prosesu ne’ebé kriminozu sira uza bainhira orijin osan ka propriedade hetan nu’udar rezultadu atividade kriminál, kriminozu sira halo brankeamentu hodi hadook, hasubar no halakon hosi orijin krimi atu nune’e mosu hanesan rezultadu atividade lejítimu.

FT mák fundu ka ativu selu-seluk ne’ebé disponibiliza ba terrorista ka organizasaun terrorista, direita ka indireita, ho intensaun katak fundu refere sei uza ba hahalok terrorizmu nian. Fundu ne’ebé uza bele mai hosi fonte lejítimu ka ilejítimu.


Oinsa prosesu brankeamentu kapitál akontese?

Bazikamente prosesu brankeamentu kapitál fahe ba faze tolu:

Kolokasaun: lukru/produto ilegál ne’ebé hetan ona, kriminozu koloka ba dahuluk iha sistema finanseiru liu hosi instituisaun finanseira (Banku, Ajensia Troka Osan, Kazinu, nsst). Faze ida-ne’e konsisti restruturasaun (tau osan iha konta bankária barak ka ativu ba titulár ne’ebé hanesan) no liu hosi ema barak hodi tau osan iha konta bankária ka ativu ba titulár diferenti.

Kamuflajen: lukru/produtu ilegál konverte ka halo transformasaun ba nia orijin liu hosi kriasaun transferénsia oi-oin entre fonte fundu no buat ne’ebé intende atu hetan, hodi nune’e mosu hanesan fundu lísitu.

Integrasaun: lukru/produtu ilísitu ne’ebé mák fase ona no investe iha ekonomia hodi fo aparensia lejítima liu hosi sosa propriedade lusu, osan mean, nsst.


Tanba sa BK no FT konsidera nu’udar krimi?

Kódigu Penál kriminaliza respeitivamente iha artigu 313 no 133 kona-ba BK no FT punidu ho pena másimu tinan 12 ba BK no tinan 25 ba krimi FT.


Rejimi jurídiku ne’ebé mák aplikavel ba BK/FT?

Rejimi jurídku aplikável iha Timor-Lese ba prevensaun BK/FT mak Lei nú. 17/2011, 28 Dezembru, altera ho Lei nú. 5/2013/III, 14 Agostu.

Oinsa Kombate BK/FT ?

  • Kriminaliza BK/FT no aplika koima;
  • Dezenvolve programa edukasaun públika hodi hasa’e konsiénsia nasionál kona-bá luta hasoru BK/FT;
  • Autoridade supervizora halo fiskalizasaun periódika hodi verifika kumprimentu ba norma no regulamentu aplikável ba entidade sujeita kona-bá obrigasaun implementa medida prevensaun tuir norma no regulamentu. Instituisaun finanseira ne’ebé ho supervizaun BCTL nian sujeitu ba regulamentu aplikável mák: Instrusaun nú. BPA/B-2003/3 kona-bá abertura no manutensaun konta bankária; no Instrusaun nú. BPA/B-2004/2 kona-bá prevensaun brankeamentu kapitál, identifikasaun kliente no manutensaun rejistu.
  • Kriasaun UIF nu’udar sentru nasionál hodi simu, analiza RTS inklui asesu informasaun relevante sira seluk no diziminasaun rezultadu análize, nu’udar medida krusiál hodi kontribui ba prosesu investigasaun BK/FT.
  • Hametin kooperasaun entre autoridade kompetente no entidade interesante sira seluk.

Tanba sa ezisténsia UIF esensiál ?
  • Implementasaun Rekomendasaun GAFI R.29 no Lei no. 17/2011;
  • Estabelesimentu UIF nu’udar esforsu nasionál hodi kombate BK/FT. UIF mak ajénsia sentrál ne’ebé simu relatóriu tranzasaun suspeita no informasaun relevante sira seluk, analiza no dizimina rezultadu análize pa Prokuradoria Jerál Repúblika, inklui fasilita prosesu investigasaun ba krimi ML/FT no mós krimi orijem sira.


Saida mák tranzasaun suspeita ?

Tranzasaun ida konsidera suspeita bainhira (i) aparénsia estrañu no laiha justifikasaun ekonomia ne’ebé klaru; (ii) iha kazu ne’ebé iha deskonfia ka razoavel hodi suspeita katak iha involvimentu brankeamentu kapitál no finansiamentu terrorizmu ka iha produtu hosi kualker infrasaun subjasente; (iii) involve fluxu tranzasaun suspeita no injustifikada.


Tanba sa komunika RTS?


Iha artigu 23 Lei nú. 17/2011, entidade sujeita hotu-hotu bainhira iha razaun forti hodi deskonfia katak tranzasaun ruma estrañu ka involve atividade brankeamentu kapitál no finansiamentu terrorizmu, tenki komunika ho lalais ba UIF.

Oinsa prazu haruka RTS ba UIF?


Entidade sujeita hotu-hotu tenki imediatamente komunika tranzasaun suspeita ba UIF.


Tipu relatóriru oinsa mák haruka ba UIF ?

    • Relatóriu Tranzasaun Suspeita (RTS) – obrigasaun instituisaun finanseira no naun finanseira bazeia ba artigu 3 Lei nú. 17/2011;
    • Relatóriu Tranzasaun Numeráriu (RTN) – obrigasaun Operadór transfere Osan (OTO) artigu 13 Instrusaun BCTL nú. 01/2013, 27 Setembru;

    • Deklarasaun ba transportasaun osan numeráriu iha formuláriu Álfandega nian – obrigasaun Autoridade Álfandega bazeia ba artigu 7 Lei nú. 17/2011.


Entidade ne’ebé de’it mak iha devér hato’o komunikasaun?

Instituisaun finanseira no naun finanseira kobre ih Lei nú. 17/2011 mák hanesan: banku/instituisaun kréditu; instituisaun mikro finansa; kompañia segurus; emisór no/ka jestór kartaun débitu no kréditu; operadór transfere osan; Kazinu; advogadu (ne’ebé fó servisu finanseiru hodi reprezenta sira nia kliente); kontabilista; auditoria independente no konsultór fiskál.


Se de’it mák iha devér asegura konfidensialidade ba informasaun ne’ebé hato’o ka solisita hosi UIF?


  • Funsionáriu no ajente UIF sujeitu ba devér konfidensialidade hanesan defini iha artigu 20 Lei nú. 17/2011. sira mós sujeitu ba kódigu konduta refere iha rezolusaun konsellu administrasaun nú. 32/2016 kona-bá termu no kondisaun empregadu BCTL.
  • Entidade sujeita, sira nian funsionáriu no ajente hanesan defini iha artigu 25 Lei nú. 17/2011.

  • The same Law provides exemption of liability to reporting entities …”according to article 23-A, the disclosure of i

    Iha Lei ne’ebé mensiona iha leten defini prestasaun informasaun ho boa fé kona-bá kualker tranzasaun suspeita hosi entidade sujeita, sei la implika kualker responsabilidade maski razaun suspeita la konfirmadu.

 

Saida mák infrasaun subjasente?

Infrasaun subjasente mak kualker krimi ne’ebé nu’udar fonte hetan osan ilísitu hodi fase ka hamutin. Infrasaun subjasente mak elementu materiál ida ba krimi brankeamentu kapitál, ezemplu, autoridade kompetente sei labele kastigu ema ne’ebé halo lavajen lukru krimi evazaun impóstu bainhira la defini nu’udar infrasaun subjasente.

Dekretu-Lei nú. 19/2009 kona-bá Kódigu Penál, ne’ebé kriminaliza BK defini lista krimi subjasente ba krimi sira ne’ebé ho pena prizaun mínimu tinan 2.

Sansaun saida mák sei aplika bainhira viola obrigasaun hatuur iha Lei ?

Inkumprimentu ba obrigasaun no devér ka inobservánsia ba prosedimentu estabelese iha Lei sei konstitui kontra ordenasaun, no sei aplika sansaun administrativa diferente ho koima entre USD5,000.00 to’o USD500,000.00 no posível aplika sansaun komesa hosi adverténsia eskrita suspensaun ka proibisaun kontinuasaun atividade ba períodu fulan 6 to’o tinan 3.

Maski UIF la’ós autoridade supervizora, unidade ida-ne’e bele desidi ba infrasaun no impoin sansaun administrativa ba kualker pesoa singulár ka entidade jurídika ne’ebé sidauk iha autoridade supervizora hodi garante kumprimentu ba rekezitu estabelese iha Lei nú. 17/2011.


Koima ne’ebé mák aplika sekarik failla hato’o RTS?

Inkumprimentu ba medida prevensaun defini iha Lei ne’ebé vigór inklui failla komunika RTS ba UIF sei konsidera hanesan infrasaun administrativa, sei aplika koima entre USD250.00 no USD 150,000.00 ba pesoa singulár, no koima entre USD1,250.00 no USD750,000.00 ba pesoa koletiva.

Saida mák Pesoa Polítikamente Esposta (PEP)?

Iha termu artigu 1 lei nú. 17/2011, PEP katak pesoa singulár ne’ebé mák dezempeña ka foin dezempeña iha tinan 1 liuba prominente ba kargu polítika ka públika, inklui mós membru família ne’ebé besik no ema ne’ebé besik ka iha relasaun sosietária ka komersiál ho sira.

Saida mák KYC no CDD ?

KYC nu’udar akrónimu ba Know Your Customer/kuiñese ó nia kliente. KYC mak faze primeiru ba medida prevensaun ne’ebé entidade sujeita iha obrigasaun nesesáriu hodi identifika, konserva no halo validasaun ba autentisidade ba kliente ka ema ne’ebé reprezenta kliente hodi komprende natureza negósiu no atividade ne’ebé hala’o no determina risku relevante.

CDD akrónimu ba Customer Due Dilligence nu’udar faze tuir mai ba medida prevensaun ne’ebé permiti instituisaun finanseira hodi hetan liutan informasaun ba kliente ka ema ne’ebé reprezenta kliente atu nune’e periodikamente halo avaliasaun ba risku relevante.


Saida mák papél autoridade supervizora iha implementasaun Lei nú.17/2011?

Autoridade supervizora responsavél hodi hasai regulamentu no instrusaun hodi superviziona ba kumprimentu instituisaun finanseira no naun finanseira kona-bá rekizitu legál ne’ebé aplikável, aplikasaun sansaun ba inkumprimentu, koopera no troka informasaun ho autoridade kompetente inklui UIF, komunika imediata ba UIF bainhira atividade suspeita ka faktu relasiona BK no FT.

Konsekuénsia saida mák sei hetan bainhira la deklara transportasaun osan numeráriu ka títulu portadór negosiável (BNI) ho montante iguál ka liu USD10,000.00 ?

La deklara ka halo deklarasaun falsu kona-bá transportasaun osan numeráriu ka BNI bainhir ema ida tama ka sai hosi teritóriu Timor-Leste, Autoridade Álfandega sei aprende parte balun ka aprende hotu kedan montante osan ne’ebé transporta no bele sujeita ba aplikasaun koima defini iha artigu 32 Lei nú. 17/2011.

Sé mák GAFI no APG ?

  • Grupo de Ação Financeira (GAFI) mak organismu inter-governmental estabelese iha tinan 1989. GAFI nian objetivu mák halo definisaun ba mellór prátika internasionál no promove implementasaun jurídiku, reguladora no medida operasionál ba kombate brankeamentu kapitál, finansiamentu terrorizmu no ameasa ne’ebé mák relasiona ba integridade sistema finanseira internasionál. Organismu ida-ne’e dezenvolve ona rekomendasaun ne’ebé rekoñesidu hanesan padraun internasionál ba kombate brankeamentu kapitál no finansiamentu terrorizmu.

  • Asia/Pacific Group on Money Laundering (APG) mak organizasaun inter-governmental hari’i iha 1997 nu’udar membru asosiadu ba GAFI, ho sekretariadu lokaliza iha Sydney, Austrália. Obrigasaun APG nian mák garantia nasaun membru iha rejiaun refere universalmente adopta no implementa rekomendasaun GAFI nian, fó asisténsia téknika no enkoraza kooperasaun no troka informasaun entre membru APG; nomós halo avaliasaun mútua hodi determina nivél kumprimentu hosi nasaun membru ba padraun internasionál kontra brankeamentu kapitál no finansiamentu terrorizmu. Timor-Leste ofisialmente sai membru APG iha Jullu 2008.

Saida mak MER ?

MER nu’udar akrónimu ba Mutual Evaluation Report.

Iha 2011, Timor-Leste sujeitu ba avaliasaun dahuluk hodi verifika kumprimentu ba Rekomendasaun 40+9, MER Timor-Leste debate no adopta iha plenária APG iha Brisbane, Austrália, ha Jullu 2012. MER adopta ho rekomendasaun lubuk ida hodi garantia Timor-Leste kumprimentu ba mekanismu adopta iha rekomendasaun GAFI nian.


Saida mák CNCBC ?

Comissão Nacional para a Implementação das Medidas Destinadas a Prevenção e Combate ao Branqueamento de Capitais e ao Financiamento do Terrorismo (CNCBC) nu’udar mekanismu koordinasaun konstitu bazeia ba Rezolusaun Governu nú. 10/2014, 9 Abríl. Komisaun ida-ne’e hodi koordena implementasaun medida ba kombate BK/FT tuir rekomendasaun GAFI nian no rekizitu impoin hosi APG ba nasaun membru sira. CNCBC lidera hosi Ministru Justisa no Ministru Negósiu Estranjeiru no Kooperasaun, no nia sekretariadu permanente lokaliza iha Ministériu Justisa.



Saida mák Grupu Egmont?

Grupu Egmont konsisti hosi UIF nasaun hot-hotu, nu’udar rede informal ida hari’i iha 1995 hodi estimula kooperasaun internasionál iha área troka informasaun, no fahe esperiénsia téknika liu hosi asaun formasaun.